सङ्खुवासभा : नेपाल विद्युत् प्राधिकरणको तुम्लिङटार–सितलपाटी २२० केभी प्रसारण लाइन आयोजनाले वन क्षेत्रको जग्गा प्रयोग गरेबापत २८.४८ हेक्टर सट्टाभर्ना जग्गा उपलब्ध गराएको छ ।

आयोजनाले खाँदबारी नगरपालिका–९, ८, २ र १० मा रहेको राष्ट्रिय वन क्षेत्रको जग्गा प्रयोग गरेको थियो । त्यसको क्षतिपूर्तिस्वरूप पाँचखपन नगरपालिका–४ मा रहेका ७१ वटा कित्ता जग्गा खरिद गरी डिभिजन वन कार्यालयलाई हस्तान्तरण गरिएको सूचना अधिकारी भण्डारीले जानकारी दिए ।

आयोजनाले ७१ कित्ताको जग्गा रजिस्ट्रेसन पास गरी केही दिनअघि डिभिजन वन कार्यालयलाई हस्तान्तरण गरेको हो । वन क्षेत्र प्रयोग गरेबापत सट्टाभर्ना जग्गा उपलब्ध गराउने प्रक्रियाअन्तर्गत उक्त जग्गा सरकारको नाममा ल्याइएको हो ।

यसैबीच, सङ्खुवासभाको मकालु गाउँपालिका–५ मा निर्माण हुन लागेको २४.९२ मेगावाट क्षमताको इन्दुवाखोला जलविद्युत् आयोजनाले रुख कटानबापत रु दुई करोड ५२ लाख २५ हजार राजस्व तिरेको छ ।

आयोजनाले रुख कटान, स्याहार, सम्भार तथा व्यवस्थापनका लागि उक्त राजस्व तिरेको डिभिजन वन कार्यालयका सूचना अधिकारी भण्डारीले बताए । आयोजनाका लागि ६०७ वटा रुख कटान हुनेछन् ।

सङ्खुवासभामा हाल २९० वटा सामुदायिक वन रहेका छन् । जिल्लाको ठूलो भूभाग वन क्षेत्रले ओगटेको छ । उपलब्ध विवरणअनुसार जिल्लामा ३८ हजार ४८५ वर्ग किलोमिटर क्षेत्र वनले ओगटेको छ ।