काठमाडौं : नेपाल विद्युत् प्राधिकरणले काठमाडौंका विभिन्न क्षेत्रमा ११ दिनसम्म विद्युत् आपूर्ति प्रभावित हुन सक्ने जनाएको छ । प्राधिकरणका अनुसार टेकु सबस्टेसनमा प्राविधिक काम गर्नुपर्ने भएकाले असोज ४ गतेदेखि असोज १४ गतेसम्म विभिन्न फिडरमार्फत वितरण हुने विद्युत् सेवा निर्धारित तालिकाअनुसार अवरुद्ध वा प्रभावित हुनेछ ।

आयोजनाअन्तर्गत ११ केभी प्यानलमा रहेका पुराना रिले हटाएर नयाँ रिले जडान गरिनेछ । त्यसका साथै रिले रेट्रोफिट तथा सबस्टेसन अटोमेसन प्रणाली जडान र परीक्षणको कामसमेत गरिने प्राधिकरणले जनाएको छ ।

उक्त कामका क्रममा १३२ केभी टेकु सबस्टेसनबाट विद्युत् आपूर्ति हुने विभिन्न वितरण केन्द्रअन्तर्गतका फिडर प्रभावित हुनेछन् । ती फिडरबाट विद्युत् आपूर्ति हुने काठमाडौंका विभिन्न क्षेत्रमा विद्युत् सेवा अवरुद्ध वा प्रभावित हुन सक्ने प्राधिकरणको भनाइ छ ।

प्राधिकरणका अनुसार सबस्टेसनमा गरिने कामको प्रकृति र प्रभावित हुने फिडरअनुसार विद्युत् आपूर्ति बन्द हुने समय फरक–फरक हुनेछ । त्यसैले असोज ४ देखि १४ गतेसम्म सबै क्षेत्रमा एकै समयमा विद्युत् अवरुद्ध हुने अवस्था भने रहने छैन ।

सम्बन्धित फिडरमा आवश्यकताअनुसार विद्युत् आपूर्ति बन्द गरी नयाँ रिले जडान, रेट्रोफिट तथा परीक्षणको काम गरिने प्राधिकरणले जनाएको छ । प्राविधिक कामका कारण उपभोक्तालाई पर्न सक्ने असुविधाप्रति क्षमा माग्दै प्राधिकरणले निर्धारित समयअनुसार काम सम्पन्न गर्न सहयोग गर्न आग्रह गरेको छ ।

नयाँ रिले जडान, रेट्रोफिट तथा सबस्टेसन अटोमेसन प्रणालीसम्बन्धी परीक्षण सम्पन्न भएपछि प्रभावित क्षेत्रमा विद्युत् आपूर्ति नियमित हुने प्राधिकरणले जनाएको छ ।

विद्युत् प्रणालीलाई थप सुरक्षित, भरपर्दो तथा आधुनिक बनाउन सबस्टेसनमा रहेका पुराना उपकरण र रिले विस्थापन गरी नयाँ प्रणाली जडान गर्न लागिएको प्राधिकरणको भनाइ छ ।