काठमाडौं।

राष्ट्रिय प्राकृतिक स्रोत तथा वित्त आयोगले गरेको स्थानीय तहको कार्यसम्पादन मूल्यांकनमा अर्घाखाँचीको पाणिनी गाउँपालिका सर्वोत्कृष्ट भएको छ । १७ सूचकांकका आधारमा गरिएको मूल्यांकनमा ८३.८४ अंक प्राप्त गर्दै पाणिनी मुलुकभरका पालिकामा पहिलो भएको हो ।

 अर्घाखाँचीको पाणिनी (८३.८४) सहित रुकुम पश्चिमको चौरजहारी (८२.१५) गुल्मीका मालिका (८१.९८) र धुर्कोट (८०.५२) उत्कृष्ट चार भएका छन् । आयोगले बिहीबार सार्वजनिक गरेको प्रतिवेदनअनुसार उत्कृष्ट चारमा रुकुम पश्चिमको चौरजहारी नगरपालिका ८२.१५ अंकसहित दोस्रो, गुल्मीका मालिका गाउँपालिका ८१.९८ अंकसहित तेस्रो र धुर्कोट गाउँपालिका ८०.५२ अंक प्राप्त गरेर चौथो । ६ महानगरपालिकामध्ये काठमाडौं सबैभन्दा कमजोर र विराटनगर सबैभन्दा अब्बल देखिएका छन् । मुलुकभरका ११ उपमहानगरपालिकामध्ये बुटवलको कार्यसम्पादन सबैभन्दा राम्रो र इटहरीको सबैभन्दा कमजोर छ ।

महानगरपालिकामध्ये सबैभन्दा कमजोर काठमाडौंले ४४.९७ अंक पाएको छ । सबैभन्दा धेरै विराटनगरको ७८.११ अंक छ । ललितपुरले ७६.३३, भरतपुरले ६८.०४, पोखराले ५४.७६ र वीरगन्जले ५४ अंक प्राप्त गरेका छन् ।

१० असारभित्र बजेट सार्वजनिक गरे/नगरेको, तोकिएकै समयमा बजेट पारित गरे/नगरेकोलाई आयोगले मूल्यांकनको आधार बनाएको छ । यस्तै आर्थिक वर्ष २०८१/०८२ मा मनोरञ्जन कर, घरजग्गा रजिस्ट्रेसन शुल्क तथा विज्ञापन करबापत संकलित रकमध्ये प्रदेश सरकारलाई दिए/नदिएको मापदण्डबाट मूल्यांकन गरिएको छ । कार्यसम्पादन मूल्यांकनका अन्य सूचकमा विद्यार्थी भर्नादर, विद्यार्थी टिकाउ दर, एसईई नतिजा, बजेट खर्चको व्यवस्था, बेरुजु, सूत्र सफ्टवेयरको प्रयोग, राजस्व परिचालन, गर्भ जाँच गराउने महिला अनुपात, खोप रहेका छन् ।