काठमाडौं ।

चितवनको इच्छाकामना गाउँपालिका–५ तुइन खोला पुल नजिक खसेका ढुंगा पन्छाएपछि मुग्लिन–नारायणगढ सडकखण्डमा सवारी आवागमन पुनः सुरु भएको छ । केही समयका लागि सडक अवरुद्ध भए पनि अहिले आवागमन सुचारु भएको सडक डिभिजन कार्यालय भरतपुरले जनाएको छ ।

माथिबाट खसेका ढुंगाहरूका कारण सडकमा सवारी रोकिँदा यात्रुहरू अलपत्र परेका थिए। ढुंगाहरू झर्ने क्रम रोकिएपछि मेशिनको प्रयोग गरी सडक सफा गरिएको र दुबै तर्फको यातायात सञ्चालनमा आएको कार्यालयले जनाएको छ ।

सडक डिभिजन कार्यालयले तुइन खोला क्षेत्रलाई पहिरोको उच्च जोखिमयुक्त क्षेत्रका रूपमा पहिचान गर्दै यात्रु र चालकहरूलाई अत्यन्त सावधानी अपनाउन आग्रह गरेको छ। वर्षा जारी रहेकाले सडकमा ढुंगा र माटो झर्ने सम्भावना अझै कायम रहेको भन्दै आवागमन अघि सडकको अवस्था बुझेर मात्र यात्रा गर्न सुझाव दिइएको छ।