काठमाडौं ।

यो वर्षको उखु क्रसिङको समय सुरु भएकै बेला उद्यागीहरु भने चिनी नबिक्ने चिन्तामा परेको छन् । नेपालमा भन्दा भारतमा केहि सस्तोमा पाइने भएकाले सिमा क्षेत्रबाट भइरहको यस्तो तस्करीले नेपाली चिनी उद्योगसहित उखु किसान नै समस्यामा पर्ने खतरा आएको उद्योगीहरुले बताएका छन् ।
मँगलबार चिनी उत्पादक संघले पत्रकार सम्मेलन गरेर अवैध आयात तत्काल रोकेर स्वदेशी चिनी उद्योग र कृषकको रक्षा गर्न सरकारसँग आग्रह गरेको छ । संघका अध्यक्ष शशीकान्त अग्रवालले गएका आर्थिक वर्षमा करिव ५० हजार मेट्रिक टन चिनी अवैध आयात भएको जानकारी गराए । अवैध भित्रिएको चिनीले गर्दा हाम्रो चिनीको माग नै छैन, उनले भने, “गत वर्षकै करिव ५ हजार मेटिक टन बाँकी छ । नयाँ क्रसिङ भएको चिनी पनि किन्न कोही आएका छैनन्” ।

सिमा क्षेत्रमा अवैध आयातकर्ताले साइकल तथा स्कुटरमार्पmत जँगल तथा चोरबाटोबाट आयात गराएर गोदामका गोदाम खडा गरेको उनको भनाइ छ । “सिमा सुरक्षा निकाय तथा भन्सार कार्यालयहरुले यस्लाई नरोके उद्योगी त मर्छन नै उखु बेच्ने किसान र ऋण दिएका बैंकसमेत समस्यामा पर्ने खतरा छ,” उनले भने ।

हाल नेपालमा १३ चिनी उद्योग सञ्चालनमा छन्। १ लाख १५ हजार ७५५ उखु कृषक परिवार चिनी उद्योगसँग प्रत्यक्ष रुपमा जोडिएका र ३० हजारबढीलाई रोजगारी दिइरहेको क्षेत्रलाई चोरी निकासीबाट आएको चिनीले बजार छोप्दा स्वदेशी उद्योग धराशयी भइरहेको अध्यक्ष अग्रवालको भनाइ छ।

हाल मुलुकमा चिनीको वार्षिक माग करिब २ लाख ५० हजार मेट्रिक टन रहेको छ। त्यसमध्ये स्वदेशी चिनी उद्योगमा आर्थिक वर्ष २०८१/८२ मा करिब २ लाख २० हजार मेट्रिक टन चिनी उत्पादन हुने प्रक्षेपण संघकाे छ। गत वर्ष २ लाख २० हजार मेट्रिक टन चिनी उत्पादन भएको र ४० देखि ५० मेट्रिक टन चोरी तस्करीबाटै आएको संघको दाबी छ।