काठमाडौँ
कोशी प्रदेश सभाका सांसदलाई राष्ट्रिय वाणिज्य बैंकले वित्तिय साक्षरता सम्बन्धी अभिमूखिकरण तालिम दिएको छ ।

कोशी प्रदेश सभासँगको सहकार्यमा भएको सो कार्यक्रममा बैंकका प्रमुख कार्यकारी अधिकृत देवेन्द्ररमण खनाल, नेपाल राष्ट्र बैंकका पूर्व गभर्नर दीपेन्द्रबहादुर क्षत्रीले सांसदहरुलाई वित्तीय साक्षरताको बारेमा स्रोत व्यक्तिको रुपमा सहजीकरण गरेका थिए ।

कार्यक्रममा कोशी प्रदेश सभाका सभामुख अम्बरबहादुर बिष्टले यस्तो कार्यक्रमको आवश्यकता बढेको बताए । उपसभामुख सृजना दनुवारले वित्तीय साक्षरतालाई विद्यालय तहको पाठ्यक्रममा राख्नुपर्ने धारणा राखिन् ।

कार्यक्रममा बैंकका प्रमुख कार्यकारी अधिकृत खनालले बैंकको वर्तमान अवस्था एवम् बैकले अर्थतन्त्रमा गरेको योगदानको बारेमा जानकारी गराएका थिए । पूर्व गभर्नर क्षेत्रीले वित्तीय नीति, मौद्रिक नीति तथा करको माध्यमबाट स्रोत परिचालन, बजेट निर्माण, वित्तीय नीति निर्माणको कानुनी आधार बारेमा प्रशिक्षित गरेका थिए ।

कार्यक्रममा पैसाको महत्व, त्यसको आदर्शतम उपयोग, ब्याजदर, बैंक, उत्पादन र रोजगारीबिचको सम्बन्ध, विकास आवश्यकता लगायतका विषयमा विमर्श भएको बैंकले जनाएको छ ।

कार्यक्रमका लागि बैंकका उपकार्यकारी अधिकृत पवन रेग्मी, विभागीय प्रमुख आनन्द सुवेदी, विफक्याब संस्थाका प्रमुख मनोज रेग्मीलगायत उपस्थित थिए ।
बैंकको हाल ७७ जिल्लामा २९४ वटा शाखा कार्यालय, ३१० वटा एटिएम र ७३ वटा एक्स्टेन्सन काउण्टर छन् ।