जाजरकोट

वन विनाशका कारण कर्णालीका लेकाली भेगमा पाइने दुर्लभ वन्यजन्तु लोप हुने अवस्थामा पुगेका छन् । अवैध चोरीसिकारी, वन विनाश र खोलामा बढ्दो प्रदूषणले जाजरकोटका बारेकोट, कुसे, जुनीचाँदे गाउँपालिकाका लेकाली भेगका जङ्गलमा पाइने वन्यजन्तु लोप हुने अवस्थामा पुगेका हुन् । मुगु हुम्ला डोल्पा जिल्लामा पनि यस्तै समस्या रहेको स्थानीय संरक्षणकर्मीले बताएका छन् ।

बिचौलियाको कारण स्थानीयले जथाभाबी जङ्गल विनाश गर्ने, खोलामा प्लास्टिक, सिसाका बोतल जथाभाबी फाल्ने, पासो जाल थाप्ने कार्य बढ्दै गएपछि पानी पिउन खोलामा आएका वन्यजन्तु पासोमा परेर मर्ने गरेका छन् । बारेकोट, कुसे, जुनीचाँदे गाउँपालिका तथा नलगाड नगरपालिकाका विभिन्न लेकली भेगमा पाइने घोरल, रतुवा, मयूर, कालिज, दुर्लभ वन्यजन्तु रेड पान्डालगायतका जङ्गली जनावरको चोरीसिकारी बढ्दै गएको छ ।

दुर्लभ वन्यजन्तु तथा पर्यटकको आकर्षणका रूपमा भएका वन्यजन्तु सरोकारवाला निकायको मौनता, स्थानीयवासीको जथाभाबी जङ्गल फँडानी र खोलामा फोहोर फाल्दा मानव स्वास्थ्यसहित दुर्लभ वन्यजन्तु लोप हुने अवस्थामा पुगेको स्थानीयको भनाइ छ ।

बारेकोट गाउँपालिका–५ का पन्छी संरक्षकका अनुसार सरोकारवाला निकायले कागजी रूपमा दस्ताबेज तयार गरी दुर्लभ वन्यजन्तु तथा पन्छी संरक्षणमा प्रगति देखाउँदै आएका छन ।