सुध्रिएन नारायणी विकास बैंक, खराब कर्जा ५०प्रतिशत
By ग्रिकोनोमी 
यस बैंकको स्थलगत निरीक्षण गरेपछि नेपाल राष्ट्र बैंकले २०७० चैत्र २७ गते नारायणी बैंकलाई समस्याग्रस्त घोषणा गर्यो । राष्ट्र बैंकले निक्षेप स्वीकार, कर्जा प्रवाह, जमानत प्रदान गर्ने लगायतका कारोबार गर्न रोक लगायो ।बैंकका सञ्चालक र व्यवस्थापकको मिलेमतोमा जथाभाबी भएको लगानी डुबेपछि यो बैंक समस्याग्रस्त अवस्थामा पुगेको थियो ।
तर अवस्था अझै सुध्रिएको देखिँदैन । पछिल्लो वित्तीय विवरण अनुसार गत आर्थिक वर्ष २०८१/८२ मा नारायणी डेभलपमेन्ट बैंकको खराब कर्जा करिब ५० प्रतिशतमाथि पुगेको छ । गत आर्थिक वर्षमा यस बैंकको खराब कर्जा ५०.९७ प्रतिशत पुगेको हो ।
बैंकले सार्वजनिक गरेको वित्तीय विवरणअनुसार अघिल्लो आर्थिक वर्ष २०८०/८१ मा यस बैंकको खराब कर्जा ४७ प्रतिशत रहेको थियो । गत आर्थिक वर्षमा यस बैंक २ करोड ५१ लाख ६९ हजार २०३ रुपैयाँ नोक्सानीमा रहेको छ । बैंकको नोक्सानी पनि अघिल्लो आवको तुलनामा बढेको छ । अघिल्लो आवमा यस बैंकको नोक्सानी १ करोड ७८ लाख १८३ रुपैयाँमात्र थियो । यस बैंकको वित्तीय अवस्था वर्षेनी खस्किँदै गएको बैंकले सार्वजनिक गरेको वित्तीय विवरणले देखाउँछ ।
बैंकको खराब कर्जाको रेसियो उच्च हुँदा बैंक कमाएको अधिकांश रकम कर्जाको प्रोभिजनको लागि छुट्टाएको छ । जसको कारण गत आर्थिक वर्षमा यस बैंकको नाफा पनि नोक्सानीमा रहेको छ । गत आर्थिक वर्षमा यस बैंकले खराब कर्जा व्यवस्थापन गर्नको लागि ‘टोटल लोन लस प्रोभिजन टु टोटल एनपिएल’ मा ७९.५५ प्रतिशत छुट्टयाएको छ । अघिल्लो आर्थिक वर्षमा यस बैंकले ७६.६८ प्रतिशत लोनको प्रोभिजन गरेको थियो ।
