काठमाडौं : चीनको तिब्बत हुँदै नेपाल प्रवेश गरेको लेहेन्दे खोला (भोटेकोशी)मा असार २४ गते मंगलबार आएको भीषण बाढीले रसुवा र नुवाकोटका निर्माणाधीन तथा सञ्चालनमा रहेका १० भन्दा बढी जलविद्युत आयोजना र सुख्खा बन्दरगाहमा पुर्‍याएको क्षतिप्रति स्वतन्त्र ऊर्जा उत्पादकहरुको संस्था, नेपाल (इप्पान) ले गहिरो दुःख व्यक्त गर्दै पीडित परिवारप्रति समवेदना प्रकट गरेको छ।

इप्पानले एक प्रेस विज्ञप्ति जारी गर्दै बाढीका कारण हालसम्म ७ जनाको मृत्यु र १९ जना नागरिक बेपत्ता भएकोप्रति दुःख व्यक्त गर्दै घटनाबाट प्रभावित जलविद्युत आयोजना, व्यापारिक नाका र सुख्खा बन्दरगाहको पुनःनिर्माण तथा वैकल्पिक व्यवस्थाका लागि अविलम्ब आवश्यक कदम चाल्न नेपाल सरकारसँग आग्रह गरेको छ।

बाढीका कारण करिब २५० मेगावाट क्षमताका जलविद्युत आयोजनाको उत्पादन बन्द भएको र ३५० मेगावाटभन्दा बढी क्षमताका निर्माणाधीन आयोजना ठप्प हुँदा ठूलाे भाैतिक र आर्थिक क्षति पुगेकाे इप्पानले जनाएको छ।