काठमाडाैँ ।
लामो समयदेखि उद्योगी र नेपाल विद्युत् प्राधिकरणबीच विवादको रुपमा चलिरहेको डेडिकेटेड फिडर तथा ट्रंकलाइन सम्बन्धी मुद्दा समाधानतर्फ अघि बढेको छ । उद्योगहरूले बाँकी रकम भुक्तानी गर्न सुरु गरेसँगै समस्या हट्दै गएको हाे ।
अशोक स्टीलले दोस्रो किस्ताका रूपमा ६३ लाख रुपैयाँ नेपाल विद्युत् प्राधिकरणलाई बुझाएको छ । डेडिकेटेड फिडर र ट्रंकलाइन प्रयोगबापत कम्पनीले यसअघि अर्थात कात्तिक २ गते ६३ लाख रुपैयाँ तिरेको थियो । प्राधिकरणका अनुसार अशोक स्टीलले हालसम्म १ करोड २६ लाख रुपैयाँ भुक्तानी गरिसकेको भए पनि अझै १७ करोड ५८ लाख १४ हजार ४०६ रुपैयाँ तिर्न बाँकी छ ।
त्यसैगरी, हुलास स्टील इन्डस्ट्रीज प्रालिले पनि दोस्रो किस्ताका रूपमा ५० लाख ४३ हजार रुपैयाँ बुझाइसकेकाे छ । हुलास स्टीलले २०७५ साल माघदेखि २०७५ बैशाखसम्मको बक्यौता १४ करोड १२ लाख ५ हजार रुपैयाँ रहेको थियो । कम्पनीले २८ किस्तामा भुक्तानी गर्ने व्यवस्था लिएर पहिलो र दोस्रो किस्ता चुक्ता गरेको हो ।
