काठमाडौ

प्रमुख श्रम गन्तव्य देश साउदी अरबसँग करिब डेढ दशकको निरन्तरको प्रयासपछि श्रम सम्झौता भएको छ । साउदी अरबको रियादमा आयोजित समारोहमा नेपाल र साउदी अरब सरकारबिच श्रमिकको सुरक्षित, व्यवस्थित तथा मर्यादित वैदेशिक रोजगारी प्रवर्धन गर्ने सम्बन्धमा हस्ताक्षर भएको हो । सम्झौतामा नेपाल सरकारका श्रम, रोजगार तथा सामाजिक सुरक्षामन्त्री राजेन्द्रसिंह भण्डारी र साउदी अरब सरकारका तर्फबाट मानव संसाधन तथा सामाजिक विकासमन्त्री अहमद बिन सुलेमान अलराजीले गरेका छन् ।

सम्झौता कार्यक्रममा सहभागी श्रम मन्त्रालयका सहसचिव पीताम्बर घिमिरेले पछिल्लो पटक नेपाली श्रमिकको पहिलो श्रम गन्तव्य देश साउदी अरबसँग श्रम सम्झौता हुनुलाई ठुलो उपलब्धिका रूपमा लिएको बताए ।   सन् २०१० देखि नै साउदी अरबसँग श्रम सम्झौताको प्रयास हुँदै आएको थियो । नेपाली श्रमिकको अधिकतम हितलाई ध्यानमा राखेर श्रम सम्झौता गरिएकाले त्यहाँ कार्यरत श्रमिकलाई धेरै राहत पुग्ने जानकारी उनले दिए । सहसचिव घिमिरेले नेपालले श्रम मन्त्रालयले विगतमा भएका श्रम सम्झौताको समेत विस्तृत समीक्षा गरिरहेकाले श्रमिक पठाउने देश, श्रम शोषण र मानव अधिकार उल्लङ्घनका विषयमा सरकारले शून्य सहनशीलता नीति अपनाए अनुरूप नै श्रम सम्झौता गरिने जानकारी उनले दिए ।