काठमाडौंः
स्वास्थ्य तथा जनसंख्या मन्त्री प्रदीप पौडेलले आफू निर्वाचित क्षेत्रको सडक मर्मतमा ढिलाइ गरको भन्दै सरोकारवालालाई काम छिटो सक्न निर्देशन दिएका छन् ।
बाँसबारी बुढानिलकण्ठ सडकमा खानेपानी तथा विद्युत विस्तारका काम भइरहेका छन् ।

काठमाडौं ५ का निर्वाचित सांसदसमेत रहेका मन्त्री पौडेलले तीन साता अघि मेलम्ची खानेपानी तथा नेपाल विद्युत प्राधिकरणले समयमै मर्मत नगरे पछि धुलो र धुवाँबाट नागरिकले सास्ती पाएको भन्दै कालोपत्रे तत्काल अघि बढाउने व्यवस्था मिलाउन भनेका थिए । एक वर्ष अघि नै काम थालिए पनि तीन निकायबीचको समन्वय नहुँदा ढिलाइ भए पछि नागरिकलाई परेको सास्ती कम गर्न भन्दै मन्त्री पौडेलले पटक पटक पहल थालेका थिए ।

बुधबार पुनः निरिक्षणका लागि पुगेका सो क्षेत्रका सांसदसमेत रहेका मन्त्री पौडेलले अब काममा थप ढिलाइ नगर्न ध्यानाकर्षण गराए । मन्त्रीसामु सम्बद्ध अधिकारीहरुले एक दुई दिनभित्रै कालोपत्रे सम्पन्न गराउने प्रतिबद्धता जनाएका थिए  ।  चक्रपथ नारायणगोपाल चोकदेखि सहिद गंगालालसम्मको खण्ड भने नेपाल विद्युत प्राधिकरणले कालोपत्रे गर्ने तयारी गरिरहेको छ ।