काठमाडौं : देशभर मनसुनी वायुको प्रभाव सक्रिय रहँदा आगामी २४ घण्टासम्म अधिकांश भू-भागमा वर्षा र हिमपातको सम्भावना रहेको जल तथा मौसम पूर्वानुमान महाशाखाले जनाएको छ।

आइतबार दिउँसोको लागि जारी पूर्वानुमानअनुसार, कोशी, मधेश, बागमती, गण्डकी र कर्णाली प्रदेशका साथै देशका पहाडी क्षेत्रका धेरै स्थानहरूमा मेघगर्जन/चट्याङसहित हल्का देखि मध्यम वर्षा हुने सम्भावना छ। साथै, कोशी, बागमती र गण्डकी प्रदेशका केही पहाडी स्थानहरूमा भारीदेखि धेरै भारी वर्षा हुन सक्ने जनाइएको छ। उच्च पहाडी तथा हिमाली भू-भागमा हल्का देखि मध्यम वर्षा र हिमपातको सम्भावनासमेत रहेको महाशाखाले उल्लेख गरेको छ।

आज रातिको अवस्थामा पनि देशभर साधारणतया बदली रहनेछ। गण्डकी, लुम्बिनी, कर्णाली र सुदूरपश्चिम प्रदेशका धेरै स्थानहरूमा तथा अन्य प्रदेशका केही स्थानहरूमा मेघगर्जन/चट्याङसहित हल्का देखि मध्यम वर्षा हुने सम्भावना छ। यस्तै, गण्डकी, लुम्बिनी, कर्णाली र सुदूरपश्चिमका थोरै स्थानहरूमा भारी वर्षा हुन सक्ने चेतावनी दिइएको छ। हिमाली र उच्च पहाडी भू-भागहरूमा रातिको समयमा पनि वर्षा र हिमपातको सम्भावना कायम रहेको छ।

मौसम विश्लेषण अनुसार, हाल देशभर मनसुनी वायुको प्रभाव सक्रिय छ भने मनसुनको न्यून चापीय रेखा सरदर स्थानभन्दा केही उत्तरतिर रहेको बताइएको छ।

महाशाखाले सम्भावित भारी वर्षा तथा हिमपातका कारण बाढी, पहिरो र हिलोकाे जोखिम बढ्न सक्ने भन्दै पहाडी तथा हिमाली क्षेत्रका बासिन्दालाई आवश्यक सतर्कता अपनाउन आग्रह गरेको छ। यातायात, कृषिकर्म र दैनिक जनजीवनमा समेत असर पर्न सक्ने देखिएकाले सचेत रहन सुझाव दिइएको छ।