नेपाल राष्ट्र बैंकले सीमाभन्दा बढी चालु पुँजी लिएका व्यवसायले बढी रकम तिर्न २ वर्ष थप समय दिएको छ । केन्द्रीय बैंकले सोमबार एक परिपत्र गर्दै बैंकर र व्यवसायीलाई राहत दिएको हो ।

राष्ट्र बैंकले सीमाभन्दा बढी कर्जा लिएका कर्जा २०८२ असार मसान्तभित्र तिरिसक्नुपर्ने व्यवस्था गरेको थियो । सीमाभन्दा बढी कर्जा तिर्ने समय असार मसान्त हुँदा चालु आर्थिक वर्षको चौथो त्रैमासमा निष्क्रिय कर्जा अत्यधिक मात्राले बढ्ने अनुमान गरिएको थियो । जसले बैंकको नाफा पनि प्रभावित हुने डर थियो । अब भने बैंक र व्यवसायीले सीमाभन्दा बढी चालुपुँजी कर्जा लिएको भए बढी कर्जा तिर्न थप २ वर्ष समय मिलेको छ ।

तर, यस्तो कर्जामा यस अघि कायम रहेको कर्जा नोक्सानी व्यवस्था रकम कर्जा नियमित नभएसम्म फिर्ता (राइट ब्याक) गर्न पाईने छैन । यसरी गरिएको कर्जा समायोजनलाई कर्जा वर्गीकरण तथा कर्जा नोक्सानी व्यवस्थाको प्रयोजनका लागि पुनरतालिकीकरण वा पुनरसंरचना मानिने छैन ।

हालको व्यवस्थाअनुसार व्यवसायीहरुले वार्षिक कारोबार रकमको २५ प्रतिशतसम्म चालुपुँजी कर्जा पाउँछन् । यदी उनीहरुले लिएको चालुपुँजी कर्जा सीमाभन्दा बढी छ भने सीमामा कायम गर्ने अवधि २०८२ असार मसान्तसम्म दिइएको थियो ।