काठमाडौ:
जलविद्युत् तथा वैकल्पिक ऊर्जाका क्षत्रमा लामो समयदेखि सहायता प्रदान गर्दै आएको नर्वे सरकारले प्रशारणलाइन विस्तारमा समेत सहायता विस्तार गर्न चाहेको छ ।
मंगलबार ऊर्जा जलस्रोत तथा सिँचाइमन्त्री दिपक खड्का सँगको भेटमा नेपालका लागि नर्वेका राजदूत तोरन द्रामदलले यस्तो सहायताको प्रस्ताव गरकी हुन् ।

द्रामदले जलविद्युत् तथा ऊर्जा विधामा नेपाली विद्यार्थीहरुलाई नर्वेमा अध्ययन अवसर पनि उपलब्ध गराउँदै आएको र यसलाई पनि अझै प्रभावकारी बनाउने बताइन् ।
मन्त्रीको सचिवालयका अनुसार राजदूत द्रामदलले नर्वेले जलविद्युतबाहेक विभिन्न सरकारी तथा गैरसरकारी संस्थासँगको सहकार्यमा वातावरण संरक्षण र जलवायु परिवर्तनको क्षेत्रमा काम गर्दै आएको बताइन ।

भेटमा ऊर्जा मन्त्री दिपक खड्काले नर्वेले नेपालमा ६० वर्षदेखि नेपालको लागि महत्वपूर्ण विकास साझेदारको भूमिका निर्वाह गरेकोमा प्रशँसा गर्दै थप सहायता विस्तर गर्ने धारणा राखे ।

खड्काले तिनाउ, आँधीखोला, झिमरुक, खिम्ती, माथिल्लो तामाकोशीलगायत ठूला जलविद्युत आयोजना र लघु जलविद्युत आयोजना निर्माणमा नर्वे सरकारको सहयोगका लागि आभार जनाए ।

मन्त्री खड्काले विद्युत उत्पादन क्षमता विस्तार गर्नुका साथै प्रसारण लाइन, सबस्टेशन र ग्रामीण विद्युतीकरणमा तत्काल सुधार गर्नुपर्ने आवश्यकता रहेको भन्दै उक्त कार्यमा नर्वेको साथ र सहयोग अपेक्षा गरेका थिए ।

उनले नेपालको ऊर्जा क्षेत्रमा सार्वजनिक–निजी साझेदारी मार्फत लगानीको प्रशस्त सम्भावना रहेकाले जलविद्युत लगायत नवीकरणीय ऊर्जा परियोजनामा लगानी गर्न राजदूतमार्फत नर्वेजियन कम्पनीलाई आग्रह गरे ।