काठमाडौँ : राजनीतिक वातावरण संगिल्दै गएपछि बंगलादेशले नेपाल वाट विद्युत् खरिद गर्ने प्रक्रिया सूचारु गर्न प्रस्ताव राखेको छ ।  नेपालका लागि बंगलादेशका राजदूत सलाहुद्धीन नोमन चौधरी आफ्नाे मुलुकले चाँडै नै दुई देशबीच विद्युत् खरिद सम्झौता हुने बताएका छन् ।

नेपालका ऊर्जा, जलस्रोत तथा सिंचाईमन्त्री दीपक खड्कासँग आज मन्त्रालयमा भएको  शिष्टाचार भेटमा राजदूत चाैधरीले बंगलादेशले चाँडै नै ४० मेगावाट विद्युत खरीद सम्झौता गरेर नेपाल र बंगलादेशबीचको ऊर्जा सहकार्यलाई अगाडि बढाउन खोजेकोे बताए । साउनको पहिलो साता देखि नै नेपालबाट ४० मेगावाट विद्युत् खरिद गर्न अन्तिमा संझौताको तयारी भइरहँदा त्यहाँको राजनीतिक उथलपुथलले गर्दा  संवादहीनताको अवस्था बनेको थियो । तर आइतबार भएको यो भेट सँगै भारतीय रुट हुँदै नेपाली बिजुली बँगलादेश जाने विषयले निश्कर्ष पाउने देखिएको छ ।

भेटका क्रममा राजदूत चाैधरीले  विद्युत उत्पादन, व्यापार र प्रसारण लाईनको विकासमा बंगलादेशले नेपाललाई सहयोग गर्ने प्रतिबद्धता पनि व्यक्त गरे ।  राजदूत चौधरीले बंगलादेशले सिंचाईको नवीनतम माध्यामबाट कृषि क्षेत्रमा थोरै जमिनबाट धेरै उत्पादन गरिरहेको भन्दै उक्त प्रविधिलाई नेपालमा भित्र्याउनका लागि आवश्यक सहयोग गर्ने  पनि बताए ।

भेटमा ऊर्जामन्त्री खड्काले नेपालमा जलविद्युतको प्रचूर सम्भावना रहेको र बंगलादेशमा बढ्दो ऊर्जा आवश्यकता रहकोले दुई देशबीचको ऊर्जा सहकार्यलाई अझ गहिरो बनाउन भेटले सहयोग पुगेको बताए ।

उनले आगामी दिनमा हुन लागेको दुई देशका सचिव तथा सहसचिवस्तरीय बैठकमा ठूला जलविद्युत आयोजना निर्माणमा सहकार्य, अन्तरदेशीय प्रसारण लाईनमा भारतीय पक्षको सहमति र विद्युत व्यापारको सुरुवातलगायत विभिन्न महत्वपूर्ण विषयमा छलफल तथा निर्णय हुने भएकाले उक्त बैठक फलदायी हुने विश्वास व्यक्त गरे ।

ऊर्जामन्त्री खड्काले चाँडै नै नेपाल विद्युत प्राधिकरण, बंगलादेश पावर डेभलपमेन्ट र भारतको विद्युत व्यापार निगमबीच ऐतिहासिक त्रिपक्षीय विद्युत व्यापार सम्झौतामा हस्ताक्षर गरी नेपालले भारतीय प्रसारण लाइनको प्रयोग गरी वर्षायाममा बंगलादेशमा हुने  विद्युत निर्यातले दुई देशबीच विद्युत व्यापारको ढोका खोल्ने बताए ।

मन्त्री खड्काले ६८० मेगावाटको सुनकोशी जलाशययुक्त जलविद्युत आयोजनाको निर्माण र विकासका लागि नेपाल विद्युत प्राधिकरण र बंगलादेश पावर डेभलपमेन्ट बोर्डबीच संयुक्त उपक्रम सम्झौता हस्ताक्षरका लागि आवश्यक प्रक्रिया अगाडि बढेकोमा राजदूतावासबाट आवश्यक पहल हुने विश्वास व्यक्त गरे ।