काठमाडौं
नेपालबाट बंगलादेश विद्युत् निर्यात गर्न बिहीबार नेपाल, भारत र बंगलादेशबीच त्रिपक्षीय सम्झौता हुने भएको छ ।

मंगालबारदेखि राजधानीमा सुरु हुन लागेको नेपाल बँगलादेश संयुक्त कार्यदल तथा संयुक्त निर्देशन समितिको बैठकको अवसरमा यस्तो संझौताको पनि तयारी भएको ऊर्जा जलस्रोत तथा सिँचाई मन्त्रालयले जनाएको छ ।

मन्त्रालयका प्रवक्ता चिरञ्जिवी चटौतका अनुसार मँगलबार र बुधबार सहसचिव स्तरीय कार्यदलको बैठक बस्ने छ भने विहीबार सचिवस्तरीय संयुक्त निर्देशन समितिको बैठक बस्दैछ ।

यही बैठकको अवसरमा विद्युत् निर्यातको संझौता पनि गर्न लागिएको हो । नेपाल विद्युत् प्राधिकरण, बंगलादेश पावर डेभपलमेन्ट बोर्ड (बीपीडीबी) तथा भारतको एनटीपीसी विद्युत् व्यापार निगम (एनभीभीएन) बीच त्रिपक्षीय ऊर्जा बिक्री सम्झौता (पीएसए) हुनेछ ।

नेपालले विद्युत् बिक्री गर्ने, भारतको प्रसारण लाइन हुँदै लैजानुपर्ने र बंगलादेशले त्यो खरिद गर्ने भएकाले तीन देशका निकायबीच त्रिपक्षीय सम्झौता हुन लागेको हो । पहिलो चरणमाम भारतले ४० मेगावाट विद्युत् भारत लग्दैछ ।

सम्झौतामा विद्युत् प्राधिकरणका कार्यकारी निर्देशक कुलमान घिसिङ, बीपीडीबीका अध्यक्ष मोहम्मद रेजुल करिम तथा एनभीभएनका प्रमुख कार्यकारी अधिकृत (सीईओ) रेनु नारंगले हस्ताक्षर गर्ने तय भएको छ ।

नेपालबाट सुरुमा ४0 मेगावाट विद्युत् निर्यात सम्झौता हुनेछ । बंगलादेशले विद्युत् आयात गर्दा भारतको प्रसारण लाइन प्रयोग गर्न दिनेबारे पहिले नै सहमति भइसकेको थियो । त्यसअनुसार गत जुलाईमा त्रिपक्षीय सम्झौता हुने गरी मिति तय भए पनि बंगलादेशमा राजनीतिक प्रदर्शन भएपछि त्यो सरेको थियो ।