काठमाडौ।

वाणिज्य बैंकहरुले कर्जा योग्य रकम तरलता पर्याप्त भएको हुँदा पुरानै ब्याज दरलाई जेठमा पनि निरन्तरता दिएका हुन्। वैशाखकै ब्याजदरलाई निरन्तरता दिनेमा १४ वटा बाणिज्य बैंक छन् भने ६  वटा वाणिज्य बैंकले ब्याजदरमा सामान्य हेरफेर गरेका छन्।

वाणिज्य बैंकहरूको औसत मुद्दती निक्षेपको ब्याजदरमा जेठ महिनामा सामान्य कमी आएको छ । व्यक्तिगत मुद्धती निक्षेपका लागि जेठ महिनाको औसत ब्याजदर ५.९४ प्रतिशत कायम भएको छ । वैशाखमा यो दर ५.९८ प्रतिशत रहेको थियो। यो कमीले औसतमा २० वटा बैंकहरूको ब्याजदर ०.०४ प्रतिशतले घटेको देखिन्छ।

एभरेष्ट, स्ट्यान्डर्ड चार्ट, सानिमा लगायत बैंकले ५ वर्षभन्दा माथिको मुद्दती निक्षेपमा केही बढी ब्याज दिएर निक्षेप तान्ने प्रयास गरे पनि छोटो अवधिको निक्षेपमा भने अधिकांश बैंकको ब्याजदर ४ प्रतिशतको रहेको देखिन्छ । कम ब्याजदरमा दीर्घकालीन निक्षेप तान्ने केही बैंकले लामो अवधिको मुद्दती निक्षेपमा केही बढी ब्याजदर प्रस्ताव गरेको देखिन्छ ।