काठमाडौं : पूर्व ऊर्जा, जलस्रोत तथा सिँचाइ मन्त्री कुलमान घिसिङ ले जेन–जी आन्दोलनपछि गठन भएको सरकारमा आफ्नो सहभागिताबारे सञ्चार माध्यम र सामाजिक सञ्जालमा आएका टिकाटिप्पणीप्रति गम्भीर ध्यानाकर्षण भएको जनाएका छन्। उनले शुक्रबार फेसबुकमार्फत सार्वजनिक गरेको विवरणमा आन्दोलनपछिको विषम परिस्थितिमा सम्माननीय प्रधानमन्त्री सुशीला कार्की तथा जेन–जी आन्दोलनका अगुवाहरूको आग्रहमा सरकारमा सहभागी भएको स्पष्ट पारेका छन्।

घिसिङले सरकारमा सहभागी हुने बेलामै आफू भविष्यमा सक्रिय राजनीतिमा जाने सोचमा रहेको र गैरदलीय सरकार भएकाले आफ्नो सहभागिता उपयुक्त नहुन सक्ने कुरा प्रधानमन्त्रीसमक्ष प्रष्ट पारेको उल्लेख गरेका छन्। तर तत्कालीन अवस्थामा आफ्नो सहभागिता आवश्यक भएको, आन्दोलनका युवाहरूको पनि यही माग रहेको तथा आवश्यकता परेपछि राजीनामा दिएर राजनीतिमा जान सकिने प्रधानमन्त्रीको आग्रहपछि जिम्मेवारी स्वीकार गरेको उनको भनाइ छ। यस विषयलाई प्रधानमन्त्री स्वयंले सार्वजनिक रूपमा उल्लेख गर्दै आएको पनि उनले बताएका छन्।

आन्दोलनपछि राज्य संरचना प्रायः शून्यताको अवस्थामा पुगेको बेला चुनौती स्वीकार गर्दै आफूले जिम्मेवारी सम्हालेको जनाउँदै घिसिङले आफ्नो अडान स्पष्ट राखेर काम गरेको र राजनीतिक प्रश्न उठेपछि पदबाट राजीनामा दिएको कुरा सर्वविदित रहेको उल्लेख गरेका छन्। “म पदलोलुप व्यक्ति होइन, राज्यले दिएको जिम्मेवारी पूरा गर्ने मान्छे हुँ,” उनले लेखेका छन्।

ऊर्जा, जलस्रोत तथा सिँचाइ, भौतिक पूर्वाधार तथा यातायात तथा शहरी विकास मन्त्रालयको जिम्मेवारी सम्हालेको ११५ दिनको अवधिमा भएका कामकारबाहीहरूले आफ्नो जिम्मेवारीबोध पुष्टि गर्ने दाबी गर्दै उनले आफ्नो विरुद्ध नियोजित रूपमा गरिएका भ्रमपूर्ण प्रचार र टिकाटिप्पणीबाट प्रभावित नहुन सबैमा आग्रह गरेका छन्। घिसिङले उज्यालो नेपाल निर्माणका लागि आफ्नो जीवन राजनीतिमा समर्पित गर्दै निरन्तर क्रियाशील रहने प्रतिवद्धता पनि व्यक्त गरेका छन्।