काठमाडौँ

मंसिर महिनाका लागि वाणिज्य बैंकहरूले प्रकाशित गरेका ब्याजदर सूचीअनुसार कात्तिकको तुलनामा औसत ब्याजदर थप घटेको छ ।  वाणिज्य बैंकको व्यक्तिगत मुद्दती निक्षेपको अधिकतम औसत ब्याजदर ०.१६० प्रतिशत विन्दुले घटेको पाइएको हो ।

कात्तिकमा व्यक्तिगत मुद्दतीको अधिकतम औसत ब्याजदर ५.२००५ प्रतिशत रहेकोमा मंसिरमा ५.०४०५ प्रतिशत कायम भएको छ । व्यक्तिगत मुद्दतीको अधिकतम ब्याजदर ग्लोबल आईएमई बैंकले ६ प्रतिशतमा निर्धारण गरेको छ, जसलाई बैंकले ३ वर्ष वा सोभन्दा बढी अवधिका लागि लागू गरेको हो ।

कात्तिकको तुलनामा मंसिरमा १० बैंकले व्यक्तिगत मुद्दती निक्षेपको अधिकतम ब्याजदर स्थिर राखेका छन् भने १० बैंकले ब्याजदर घटाएका छन् । ब्याजदर घटाउने बैंकहरूमा एनआईसी एशिया, प्राइम कमर्सियल, स्ट्यान्डर्ड चार्टर्ड, नबिल, सिद्धार्थ, कुमारी, सानिमा, हिमालयन, नेपाल एसबीआई र सिटिजन्स बैंक छन् । स्थिर राख्ने बैंकहरूमा कृषि विकास, एभरेस्ट, नेपाल बैंक, लक्ष्मी सनराइज, माछापुच्छ्रे, प्रभु, राष्ट्रिय वाणिज्य, ग्लोबल आईएमई, नेपाल इन्भेस्टमेन्ट मेगा र एनएमबी बैंक परेका छन् ।

अहिले बैंकहरूले छोटो अवधिका मुद्दती निक्षेपमा कम र लामो अवधिका लागि केही बढी ब्याजदर प्रदान गर्दै आएका छन् । धेरै बैंकले ५ वर्षभन्दा माथिको अवधिका लागि उच्चतम ब्याजदर उपलब्ध गराउँछन् ।

व्यक्तिगत मुद्दतीको ब्याजदर घटेपछि बचत तथा संस्थागत मुद्दती निक्षेपमा पनि ब्याजदर स्वतः घट्ने प्रवृत्ति हुन्छ । निक्षेपको ब्याजदर घट्दा आधारदरमा प्रभाव पर्ने भएकाले कर्जाको ब्याजदर पनि कम हुँदै जान्छ ।