काठमाडौं,

दिगो पूर्वाधार निर्माणमा भइरहेका विश्वव्यापी अभ्यास, लगानीका लागि नवीन वित्तिय मोडेल उपलब्ध पुँजी र प्रविधिदेखि पूर्वाधार विकासमा प्रादेशिक र स्थानीय सरकारको भूमिकासम्मका विषयमा गहनतम छलफल गर्दै पूर्वाधार सम्मेलनको पाँचौ संस्करण सम्पन्न भएको छ ।

नेपाल सरकार, भौतिक पूर्वाधार तथा यातायात मन्त्रालय र नेपाल उद्योग परिसंघको संयुक्त आयोजनामा आयोजित दुई दिने सम्मेलनमा यस्ता विषयमा करिव ३५ अन्तरराष्टिय वज्ञ तथा ७० भन्दा धेरै स्वेदशी विज्ञ लगानीकर्ता लगायतले गहनतम छलफल गरे ।

। “सम्मेलनमा पूर्वाधार विकासका मोडलहरु, नेपालमा लागू गर्न सकिने व्यावहारिक पक्षहरुको पहिचान गर्ने सन्दर्भमा निकै उपयोगी भयो,” समापनका क्रममा परिसंघ अध्यक्ष राजेशकुमार अग्रवालले भने, “हाम्रा पूर्वाधार परियोजनाहरू आर्थिक रूपमा मात्र नभई सामाजिक र वातावरणीय रूपमा पनि दिगो रहेको सुनिश्चित गर्न चाल्नुपर्ने कदमहरूबारे स्पस्ट धारणाहरु आए ।”

सम्मेलनमा नेपालको विकास पद्धतिमा नयाँ डिस्कोर्स स्थापित गर्न सक्ने गरी बहस भएको उनको आँकलन छ ।अग्रवालले सम्मेलनमा नेपालको दिगो विकासलाई अघि बढाउन रणनीतिक लगानीको महत्वका विषयमा आएका सुझावहरु नेपाल सरकारलाई उपलब्ध गराउने बताए ।

सम्मेलन समापन समारोहमा पूर्व प्रधानमन्त्री पुष्पकमल दाहाल ‘प्रचण्ड’ ले नेपालको समग्र आर्थिक विकासका लागि भौतिक पूर्वाधारको विकास अपरिहार्य रहेको बताए । उनले नेपाल सरकारले केही समय अगाडि आयोजना गरेको लगानी सम्मेलनका बेला केही कानुनहरुमा सुधार गरी लगानीका लागि उपयुक्त वातावरण बनाएको उल्लेख गर्दै पूर्वाधार सम्मेलनमा आएका सुझाव पूर्वाधार विकासका लागि महत्वपूर्ण हुने बताए । सम्मेलनमा आएका सुझावहरुलाई नेपाल सरकारले ग्रहण गरी सोही अनुरुप सुधार गर्ने विश्वास समेत उनले ब्यक्त गरे ।

समापन समारोहमा नेपाल उद्योग परिसंघका प्रेसिडेन्ट एम्रेटस् विनोद चौधरी, भौतिक पूर्वाधार तथा यातायात मन्त्रालयका सचिव केशव कुमार शर्मालगायतले पूर्वाधार सम्मेलनले पूर्वाधार विकासका लागि नेपालले ध्यान दिनुपर्ने विषयहरुमा विदेशी एवं स्वदेशी विज्ञहरुबाट महत्वपूर्ण सुझाव आएको बताए । सचिव शर्माले यस सम्मेलनमा आएका सुझावहरुलाई सरकारले ग्रहण गर्दै कार्यान्वयनका लागि आवश्यक पहल गर्ने प्रतिबद्धता पनि जनाएका छन् ।