काठमाडौं ।

स्वास्थ्य क्षेत्रलक्षित विदेशी अनुदान तथा ऋण सहायताका परियोजना घट्न थालेपछि स्वास्थ्य तथा जनसंख्या मन्त्री प्रदीप पौडेल आगामी आर्थिक वर्षको बजेट व्यवस्थापनको दबावमा परेका छन् ।

मंगलबार मन्त्रालयअन्र्तगतका विभिन्न महाशाखा तथा केन्द्र प्रमुखहरुलाई मन्त्रालयमा बोलाएर मन्त्री पौडेलले दवावका बीच राम्रो परिणाम निकाल्ने गरी काम गर्न आग्रह गरे । खास गरी अमेरिकी सहायताको युएसएआईडीका कार्यक्रमहरु निलम्बित अवस्थामा हुँदा मन्त्रालय र दाताका सहकार्यका विभिन्न कार्यक्रम अन्योलमा परेका छन् ।

“दातृ निकायहरुबाट बजेट कटौतीका समस्या हाम्रा आम समस्या हुन्,” मन्त्री पौडेलले भने, “समस्या जसले पनि देखाउन सक्छ । तर हामीले भएका श्रोतको अधिकतम उपयोग गरेर त्यसको समाधान पनि निकालौं ।” यद्धपी उनले स्वास्थ्य राज्यको अनिवार्य दायित्वको विषय भएकाले बजेटको धेरै चिन्ता नलिन सुझाए । स्वास्थ्यमा दाताको बजेट कटौतीले परेका समस्याबारे आफू जानकार रहेको भन्दै मन्त्री पौडेलले अनिवार्य आवश्यक विषयमा सरकारले विकल्प दिने प्रतिबद्धता जनाए ।

मन्त्री पौडेलले यसपाली आर्थिक वर्षको अन्त्यसम्ममा अधिकतम नतिजा प्राप्त हुने गरी कर्मचारी तन्त्रलाई सक्रिय हुन निर्देशन गरे ।  मन्त्री पौडेलले मन्त्रालयअन्र्तगतका महाशाखा तथा केन्द्रहरुको नियमित रुपमा कार्य प्रगतिको रिपोर्टका आधारमा आवश्यक पृष्ठपोषण दिंदै आइरहेका छन् ।

यसक्रममा मंगलबार प्रगति कमजोर भएका महाशाखा तथा केन्द्रहरुलाई मन्त्री पौडेलले लक्ष्यअनुसार काम गर्नका लागि सजग बनाएका हुन् । “हामीसँग बजेटमा श्रोत छ तर सोचजस्तो कार्यान्वयन हुन नसकेको विषय समीक्षा गरौ”, उनले भने, “अब ४ महिना बाँकी छ पूर्ण उपयोग र परिणाममुखी नतिजा दिनुहोला ।”