काठमाडौँ ।
नेतृत्व चयन र आगामी कार्यदिशा निर्माणका लागि देशभरका करिव ४ हजार ५ सय युवा(जेन जी) अहिले भर्चूअल छलफलमा जेटका छन् । सूचना प्रविधि र युवा पुस्ता केन्द्रित अनलाइन सञ्चारमाध्यम टेकपानाका अनुसार उनीहरु सोमबार र मंगलबार भएको देशव्यापीे प्रदर्शनको समीक्षा गर्दै आगामी रणनीति तय गर्न उनीहरूले बुधबार दिउँसोदेखि भर्चुअल संवाद थालेका हुन् ।

समाचारमा जनाइए अनुसार डिस्कर्ड नामक सामाजिक सञ्जालको ‘youth against corruption’  च्यानलमा सुरु भएको छलफलमा करिब ४५०० युवा सहभागी छन् । स्वःस्फूर्त रूपमा सडकमा आएका युवाहरूको कुनै एक निश्चित नेता वा संगठन नभएकाले अब कसलाई प्रतिनिधि वा वार्ताकार बनाउने भन्ने विषयमा छलफल केन्द्रित भएको छ ।

छलफलमा सहभागीले आगामी दिनको एकिकृत स्वरुप र प्रभावकारिता सृजना गर्ने र राज्यसँग सम्भावित वार्ताका लागि अघि सर्ने नेतृत्व चयनका विषयमा गम्भीर बहस गरिरहेका छन् ।