काठमाडौः

डेडिकेटेड र ट्रंकलाईन महशुल वापतको बाँकी बक्यौता रकम भुक्तान नगरेको भन्दै नेपाल विद्युत् प्राधिकरणले ३४ उद्योगको विद्युुत् लाइन काटेको छ ।

प्राधिकरणले गत असोज २४ गते ४९ उद्योग र ती उद्योगले तिनुपर्ने रकम सहित खुलाएर कात्तिक ८ गते सम्म रकम तिर्न अन्यथा कानुन बमोजिम कारबाही गर्ने गर्ने सार्वजनिक सूचना गरेको थियो । तर कुनै उद्योगीले रकम तिर्न नआएपछि प्राधिकरणले सम्बन्धित वितरण केन्द्रलाई विहीबार राति त्यस्ता उद्योगको विद्युत आपूति विच्छेद गर्न निर्देशन गरेको थियो ।

कुल ४९ उद्योग मध्ये ७ वटा उद्योगले यही मुद्धामा अदालतबाट अन्तरिम आदेश प्राप्त गरी विद्युत् आपूर्ति विच्छेद गर्न नमिल्ने भएकाले नकाटिएको प्राधिकरणले जनाएको छ । यसबाहेक ६ वटा उद्योगले किस्ता बन्दी सुविधा लिएर महशुल भुक्तान गरेकाले विद्युत् नकाटिएको प्राधिकरणले जनाएको छ ।

यस्तै २ सार्वजनिक संस्थानहरुसँग हिसाव मिलन गर्न मिल्ने भएकाले विद्युत् आपूर्ति नकाटिएको जनाइएको छ ।
विहीबार यो विषयमा सरकारले प्राधिकरणलाई कुनै लिखित निर्देशन नदिएपछि प्राधिकरण नियमानुसार लाइन काट्ने बाध्यतामा पुगेको हो ।

प्राधिकरणका कार्यकारी निर्देशक कुलमान घिसिङले महशुल नतिर्ने उद्यागीका जलविद्युत् तथा सौय आयोजनाका रकम पनि भुक्तानी रोक्ने र उनीहरुको आवसीय विद्युत् आपूर्ति पनि रोक्ने विकल्प समेत प्रयोग गर्ने बताएका छन् ।