काठमाडौं:

सरकारले हिमाली तथा उच्च पहाडी क्षेत्रमा सम्भावित हिमपात र तराई–मधेसमा हुन सक्ने शीतलहरबाट सुरक्षा प्रदान गर्न राष्ट्रिय कार्ययोजना–२०८२ को मस्यौदा तयार गरेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले सरोकारवालासँगको परामर्शपछि कार्ययोजनालाई अन्तिम रूप दिएको हो ।

गृहमन्त्री ओमप्रकाश अर्यालको निर्देशनअनुसार तयार गरिएको कार्ययोजनामा हिमाली तथा उच्च पहाडी २९ जिल्ला र तराई–मधेसका २१ जिल्ला जोखिममा पर्ने उल्लेख छ। कोशी, मधेस, गण्डकी, लुम्बिनी र सुदूरपश्चिम प्रदेशका विभिन्न जिल्लामा शीतलहर र हिमपातको प्रभाव बढी हुने अनुमान गरिएको छ ।

प्राधिकरणका प्रमुख कार्यकारी अधिकृत दिनेशप्रसाद भट्टका अनुसार कार्ययोजना छिट्टै गृहमन्त्रीको अध्यक्षतामा पारित गरी कार्यान्वयनमा लैजाने तयारी गरिएको छ । विपन्न, ज्येष्ठ नागरिक, बालबालिका, दीर्घरोगी, गर्भवती, सुत्केरी तथा अपाङ्गता भएका व्यक्तिलाई लक्षित गर्दै आवश्यक राहत सामग्रीको अग्रिम व्यवस्था गर्ने प्रावधान कार्ययोजनामा समावेश छ ।

मंसिर १५ भित्र प्रभावित क्षेत्र र लक्षित वर्गको पहिचान गरी तथ्याङ्क अद्यावधिक गर्ने, पूर्वसूचना प्रणालीलाई सक्रिय बनाउने तथा हिमपात–शीतलहरले पार्न सक्ने प्रभाव न्यूनीकरणका कार्यहरू कार्ययोजनामा समेटिएका छन् ।