काठमाडौं ।

नेपाल विद्युत् प्राधिकरणको कार्यकारी निर्देशकबाट बर्खास्त गरिएका कुलमान घिसिङले जनताको घरमा बिजुली र्पुयाउनु नै आफ्नो कार्यकालको सबैभन्दा ठूलो उपलब्धि भएको बताएका छन् ।

सर्वोच्च अदालतबाट अन्तरिम आदेश नआएको भोलिपल्ट जनतालाई जनकारी दिन भन्दै पत्रकार सम्मेलन गरेका उनले आपूmलाई सरकारले नेपाल विद्युत् प्राधिकरणको कार्यकारी निर्देशकबाट हटाएको भए पनि जिम्मेवार नागरिकका रूपमा आफ्नो काम, कर्तव्य र अभिभारा कहिल्यै कम नहुने उनले बताए ।

आफूलाई बर्खास्त गर्नुलाई उनले राष्ट्रसेवक कर्मचारीलाई हतोत्साही र अपमानित बनाउने कार्यका रूपमा टिप्पणी गरे । “नेपाली जनतालाई भरपर्र्दो गुणस्तरीय, पर्याप्त र सुरक्षित विद्युत् आपूर्ति उपलब्ध गराउने मुख्य उद्देश्यलाई इमानदारीपूर्वक पूरा गर्ने क्रममा खटिरहेको राष्ट्रसेवक कर्मचारीलाई हतोत्साही एवम् अपमानित बनाउने दुराशय सफल भएकोमा कतिपय व्यक्ति, समूह वा शक्तिले आफूलाई सफल ठानेका होलान्,” उनले भने, “तर, नेपाली जनताले दिएको स्नेह र आशीर्वादले मलाई हार्न दिएको छैन ।”

सरकारले बजेट नै नदिएको अवस्थामा समेत प्राधिकरणले आफ्नै स्रोतसाधनबाट विद्युतीकरणको काम गरिरहेको उनले बताए । आफ्नो कार्यकाल र भूमिकाप्रति असन्तोष हुनुपर्ने कुनै कारण नरहेको उनले सुनाए ।

“गाउँबस्तीको विद्युतीकरण मात्र हैन, स्थानीय निकायहरूसँगको साझेदारीमा स्मार्ट सडक बत्ती विस्तार गरी सहर उज्यालो बनाउने कार्यमा समेत ठूलो लगानी गरिएको छ,” उनले भने, “जनतालाई उज्यालो दिनु नै राष्ट्रहितविपरीतको अपराध हो ? यसको जवाफ देश र समाजले अवश्य खोज्नेछ भन्ने मेरो विश्वास छ ।”

बर्खास्त गरिएको दिन पनि आफू चेपाङ समुदायको बस्तीमा बत्ती बाल्ने कार्यमा तल्लीन रहेको उनले बताए । सार्वजनिक संस्थाको बक्यौता उठाउन खोज्दा सरकारले आफूलाई अपराधी बनाएको उनले आरोप लगाए । वर्तमान सरकारले प्राधिकरणलाई धराशायी बनाउन खोजेको उनको भनाइ थियो । घिसिङले आफूलाई हटाउन लागि परेका पक्षले हाल महशुल तिनु नपरेको आभाशगरेपनि भविश्यमा पछुताउनु पर्ने अवस्था आउने ठोकुवा गरे ।

कार्यकाल पूर्ण सफल

पत्रकार सम्मेलनमा कार्यकारी निर्देशक घिसिङले आफ्नो कार्यकाल पूर्ण सफल भएको बताए । दुईपटक प्राधिकरणको नेतृत्वमा बस्दा देशलाई लोडसेडिङमुक्त बनाएको, घाटामा चलेको प्राधिकरणलाई नाफामा लगेको, विद्युत् उत्पादन, प्रसारण र बिक्रीवितरणमा ध्यान दिएकोलगायतका आफ्नो कार्यकालमा भएका महत्त्वपूर्ण कामको फेहरिस्त उनले शुक्रबारको पत्रकार सम्मेलनमा प्रस्तुत गरे।

‘जलस्रोतको धनी देशमा करिब आठ वर्षअघिसम्म हिँंउदमा १५/१६ घन्टा र वर्खामा पनि लोडसेडिङ हुनु आम विषयजस्तै थियो । लोडसेडिङ सदाका लागि विदा गरी ‘उज्यालो नेपाल’ बनाउने अभियानसँगै घर र कार्यालय मात्र होइन, वैशाख २०७५ देखि औद्योगिक ग्राहकका लागि पनि लोडसेडिङ अन्त्य गरिएको थियो’, उनले भने ।