काठमाडौं,

हुन्डाई गाडीको नेपालका लागि आधिकारिक वितरक लक्ष्मी इन्टरकन्टिनेन्टल प्रालिले नयाँ क्रेटाको बिक्री शुरु गरेको छ । नयाँ क्रेटालाई कम्पनीले केही दिनयता नेपाली सडकमा परिक्षण गर्दै आएको थियो । भारतीय बजारमा ६ महिना अघिनै लन्च भएको नयाँ क्रेटाले नेपाली एसयूभी पारखीमाझ बहुप्रतिक्षित एसयूभीको पहिचान बनाएको छ ।

नयाँ क्रेटा विभिन्न ६ भेरिएन्टमा उपलब्ध रहेको कम्पनीले जनाएको छ । यसको सुरुवाती मूल्य ५५ लाख ९६ हजार रुपैयाँ निर्धारण गरिएको छ । पहिलेको मोडल भन्दा नयाँ मोडलमा धेरै फिचर अपडेट गरिएको छ । नयाँ क्रेटाको अगाडि फेसिया र पछाडिको भागमा ब्यापक परिमार्जन भएको छ । अगाडि एल आकारको एलइडी डे टाइम रनिङ लाइट र नयाँ हेडल्याम्पको प्रयोग उत्कृष्ट देखिन्छ । विल्कुलै नयाँ र पृथक रियर लाइटमा यसलाई आकर्षक देख्न सकिन्छ ।

नयाँ क्रेटाको अगाडी भागमा प्यारामेट्रिक ब्ल्याक क्रोम ग्रिल, स्लिक क्वाड बीम एलईडी हेडल्याम्प र नयाँ डिजाइनको बम्पर राखिएको छ । साथै यसमा आकर्षक साइड लाइन र नयाँ एलोई ह्विलहरु पनि छन् । त्यसैगरी पछाडी भागमा कनेक्टिङ एलईडी टेल लाइट सेटअप र रिडिजाइन गरिएको बम्पर समावेश गरिएको छ ।

यसको ड्यासबोर्डलाई कालो र खैरो थिममा सजाइएको छ भने इन्फोटेनमेन्ट सिस्टम र डिजिटल इन्स्ट्रयुमेन्ट क्लस्टर पहिलेभन्दा निकै आकर्षक छ । यसमा दुबै स्क्रिन समान १०.२५ इन्चका छन् । ८–स्पिकर वोस साउन्ड सिस्टम, एम्वर एम्विएन्ट लाइटिङ, पानारोमिक सनरुफ, भेन्टिलेटेड सिटहरु र डुअल जोन अटोमेटिक क्लाइमेट कन्ट्रोल जस्ता विशेषताहरु समावेश छन् ।

नयाँ क्रेटाले आरामदायी, उत्साहजनक र साहसीपूर्ण ड्राइभिङ अनुभव प्रदान गर्ने विश्वास कम्पनीले लिएको छ ।
क्रेटा सन् २०१५ देखी नै नेपाली एसयूभी पारखीको विश्वास जित्दै आएको एक सफल कम्प्याक्ट एसयूभी हो ।

विगत १ दशक भन्दा बढी समयदेखी नेपालमा हुन्डाई गाडीहरु उपलब्ध गराइरहेको लक्ष्मी इन्टरकन्टिनेन्टल प्रालिले उत्कृष्ट सेवा र ग्राहकको सन्तुष्टिलाई प्राथमिकतामा राख्दै आएको छ ।

प्रिमियम तथा गुणस्तरिय सवारी, उच्च रिसेल भ्यालु र उत्कृष्ट बिक्री पछिको सेवाले गर्दा नै हुन्डाई नेपाली उपभोक्ताहरुको शिर्ष रोजाइमा पर्दे आएको छ ।