काठमाडौं
चार सय केभि क्षमताको अन्तर्देशीय सीमापार विद्युत् प्रसारण लाइन ढल्केबर–मुजफ्फरपुरको क्षमता एक हजार मेगावाट कायम गरिएको छ । केही दिनअघि भारतको नयाँ दिल्लीमा भएको नेपाल–भारत संयुक्त प्राविधिक टोली (जेटीटी) को १५ औं बैठकमा उक्त प्रसारण लाइनको क्षमता आठ सयबाट एक हजार मेगावाट पु¥याउन सहमति जुटेको ऊर्जा जलस्रोत तथा सिँचाइ मन्त्रालयले जनाएको छ ।

नेपाल विद्युत् प्राधिकरणले इनरुवा–ढल्केबरु ४०० केभीमा चार्ज गरेपछि यसको क्षमता प्रयोगको सिमा बढाइएको हो । ४ सय केभि डबल सर्किट सो प्रशारणलाईनको प्राविधिक क्षमता भने २ हजार मेगावाट हो ।सतजल जलविद्युत् कम्पनीले अरुण तेस्रोको बिजुली पनि ढल्केबर सवस्टेशनबाट भारत लैजाने जनाइएको छ । क्षमताअनुसार विद्युत् प्रसारण गर्ने नेपालका आन्तरिक संरचनाहरु तयार नभएका कारण भारतले यसको पूर्ण क्षमतामा सहमति नजनाएको हो ।

बैठकमा सुदूर पश्चिम क्षेत्रमा उत्पादित बिजुली भारत निकासीका लागि चमेलिया (नेपाल) – जलजीवी (भारत) २८ किलोमिटर लामो २२० केभीको प्रसारण लाइन निर्माणबारे छलफल भएको जनाइएको छ । भारतले दस वर्षमा १० हजार मेगावाट बिजुली नेपालबाट आयात गर्ने सम्झौता भइसकेको छ भने नेपाल सरकारले सन् २०३५ सम्ममा २८ हजार ५ सय मेगावाट बिजुली उत्पादन गरी १३ हजार मेगावाट भारत निर्यात गर्ने तयारी गरेको छ ।
बैठकमा नेपाली पक्षको नेतृत्व ऊर्जा मन्त्रालयका सहसचिव सन्दीपकुमार देवले गरेका थिए । भारतीय टोलीनको नेतृत्व केन्द्रीय विद्युत् प्राधिकरणका चिफ इन्जिनियर डीएस पैरवाले गरेका थिए ।