काठमाडौं ।

वाणिज्य बैंकहरुको नाफामा दवाब देखिएको छ । चालु आर्थिक वर्षको दोस्रो त्रैमासमा वाणिज्य बैंकहरुको नाफा घटेको हो ।
बैंकहरुको निष्क्रिय कर्जा र सम्भावित कर्जा नोक्सानी व्यवस्थाका छुट्याएको रकम बढ्दै जाँदा नाफा प्रभावित बनेको हो ।

बैंकहरुले प्रकाशित गरेको दोस्रो त्रैमासको वित्तीय विवरण अनुसार २० वाणिज्य बैंकहरुको नाफा गत आर्थिक वर्ष २०८०/८१ को सोही अवधिको तुलनामा ४.३६ प्रतिशतले घटेको हो । २० वाणिज्य बैंकले गत आर्थिक वर्षको दोस्रो त्रैमाससम्म २८ अर्ब ६८ करोड ८३ लाख मुनाफा आर्जन गरेकोमा चालु आवको सोही अवधिमा २७ अर्ब ४३ करोड ७० लाख मुनाफा आर्जन गरेका हुन् ।

यस्तै एभरेष्ट बैंकको नाफा २१.११ प्रतिशतले वृद्धि भई २ अर्ब ७ करोड ४८ लाख र एनएमबी बैंकको नाफा ४५.६० प्रतिशतले वृद्धि भई २ अर्ब पुगेको छ । दोस्रो त्रैमासको तथ्यांकअनुसार एनआईसी एशिया बैंकको नाफा सबैभन्दा धेरै ९१.५० प्रतिशतले गिरावट भएको छ । प्राथमिक पुँजीकोषको दबाबमा रहेको बैंकको व्यवसाय घट्दै गएको छ । जसले बैंकको आम्दानी घट्दै गएको छ । दोस्रो त्रैमासमा बैंकले १५ करोड ५२ लाख नाफा आर्जन गरेको हो । गत आवको सोही अवधिमा बैंकले १ अर्ब ८२ करोड ६८ लाख नाफा आर्जन गरेको थियो । यस्तै निष्कृय कर्जा बढेसँगै कर्जा नोक्सानी व्यवस्था पनि उच्च दरमा बढेको छ । सोही कारण बैंकको नाफा उच्च दरमा गिरावट भएको हो ।

यसैगरी कुमारी बैंकको नाफा ६८.२१ प्रतिशतले गिरावट भएर २७ करोड ५७ लाखमा सिमित भएको छ । गत आवको सोही अवधिमा बैंकले ८६ करोड ७२ लाख नाफा कमाएको थियो । पुर्ण सरकारी स्वामित्वको राष्ट्रिय वाणिज्य बैंकको नाफा ६२.१४ प्रतिशतले घटेर ७६ करोड ३० लाखमा झरेको छ । त्यस्तै सिद्धार्थ बैंकको नाफा पनि ५३.३६ प्रतिशतले घटेर ५३ करोडमा झरेको छ ।